Mikill stuðningur við aðskilnað

Mikill meirihluti landsmanna er fylgjandi aðskilnaði viðskiptabanka og fjárfestingarbanka. Þetta leiðir ný skoðanakönnun Capacent Gallup í ljós sem unnin var fyrir Straum fjárfestingabanka. Skoðanakönnunin var gerð dagana 20. til 27. september en Capacent hafði samband við 1.375 Íslendinga á kosningaaldri. Svarhlutfall var 60,1%.

Einungis 4,2% þeirra einstaklinga sem svöruðu í könnuninni voru andvíg aðskilnaði. Alls 2,0% voru alfarið andvíg, 0,4% voru mjög andvíg og 1,8% frekar andvíg. Þá svöruðu 15,6% svarenda hvorki né.

Ríflega fjórir af hverjum fimm svarenda, eða 80,2%, voru hins vegar fylgjandi aðskilnaði. Alls 37,6% voru alfarið hlynnt aðskilnaði, 21,6% voru mjög hlynnt og 21,0% frekar hlynnt.

Karlar hafa aðeins meiri efasemdir um aðskilnað en konur og þá eru efasemdir einnig meiri í hópi þeirra sem yngri eru.

Fjórtán þingmenn úr öllum flokkum nema Sjálfstæðisflokknum lögðu fram þingsályktunartillögu um aðskilnað viðskiptabanka og fjárfestingarbanka á síðasta þingi. Þá er breytingin einnig liður í efnahagstillögum sem Sjálfstæðisflokkurinn kynnti á sama þingi.- mþl