Kaupþing frestar nauðasamningi

Kaupþing hefur frestað framlagningu nauðasamnings fram á síðasta ársfjórðung ársins 2012. Áður stóð til að leggja nauðasamninginn fram á þriðja ársfjórðungi, sem lýkur í lok septembermánaðar. Þetta kemur fram í tilkynningu á vef þrotabús Kaupþings sem birt var í gær.

Í tilkynningunni segir að mörg útistandandi mál, sem sum séu ekki á valdi slitastjórnarinnar, valdi þessum töfum. Finnist lausn í þessum málum, sem eru ekki tilgreind frekar, verði nauðasamningurinn lagður fram fyrir árslok.

Eftir nauðasamning verður Kaupþing íslenskt eignarhaldsfélag í eigu, og undir stjórn, almennra kröfuhafa bankans. Þeir eru að langstærstu leyti erlendir aðilar. Einnig er mögulegt að sérstakt eignastýringarfyrirtæki verði sett á laggirnar til að fara með áframhaldandi eignastýringu fyrir Kaupþing. Þetta kemur fram í kynningu sem slitastjórn bankans hélt fyrir kröfuhafa hans 31. maí síðastliðinn. Eignarhaldsfélagið yrði meðal annars eigandi að 87 prósentum hlutafjár í hinum íslenska Arion banka.- þsj