Ákvarða ekki eigin laun

Björn Zoëga, forstjóri Landspítalans, vill sem minnst tjá sig um þá gagnrýni sem hefur komið fram á launahækkun hans. „Ég ákveð auðvitað ekki eigin laun, þau eru ákvörðuð af ráðherra og kjararáði. Ég get einungis lýst minni aðkomu að þessu máli. Ég var á leið úr landi í nýja vinnu og þurfti því að segja upp mínu starfi á Landspítalanum. Nokkrum klukkustundum eftir að ég gerði það var ég beðinn um að endurskoða hug minn og eftir að hafa hugsað málið og rætt við ráðherra komumst við að samkomulagi um áframhaldandi samstarf. Það er það eina sem ég hef um þetta að segja.“

Stjórn Læknafélag Íslands sendi frá sér yfirlýsingu vegna launahækkunar Björns í gær. Í yfirlýsingunni segir að hún skjóti skökku við þegar litið sé til ástandsins á Landspítalanum og áralangs niðurskurðar í heilbrigðiskerfinu. Hins vegar segir í yfirlýsingunni að félagið telji að vel menntaðir heilbrigðisstarfsmenn eigi að fá laun í samræmi við menntun, reynslu og álag í starfi. Þá eigi að sporna við brottflutningi þeirra í betur launuð störf í öðrum löndum en það eigi við um fleiri en einungis forstjóra Landspítalans. Spurður út í þessa yfirlýsingu svarar Björn: „Auðvitað skal stefnt að því að laun íslenskra lækna og annarra heilbrigðisstétta séu sem samkeppnishæfust. Það er hins vegar ekki forstjórans að semja um kaup og kjör við starfsmenn. Auðvitað vill maður halda starfsfólki spítalans og við munum reyna það áfram eins og við getum innan þess ramma sem við vinnum eftir.“