Raforkukostnaður hækkar alls staðar

Raforkukostnaður heimila landsins hefur hækkað nokkuð frá ágústmánuði 2011, að því er fram kemur í könnun sem Alþýðusamband Íslands (ASÍ) lét gera, en þó er nokkur munur milli orku- og dreififyrirtækja.

Miðað við ársneyslu upp á 4.000 kílóvattstundir hefur samanlagt verð á orku, flutningi og dreifingu hækkað mest hjá Rarik dreifbýli/Orkusölunni, um 8,6%, en minnst hjá Norðurorku/Fallorku, um 2,7%.

Á ársgrundvelli er samanlagður kostnaður hæstur hjá Rarik dreifbýli/Orkusölunni, rúmar 90 þúsund krónur, en lægstur hjá Norðurorku/Fallorku, rúmar 60 þúsund krónur.

Sé einungis horft til orkusölunnar kemur í ljós að afar lítill munur er á verði. Orkubú Vestfjarða er ódýrast með rúm 23 þúsund og hæst hjá Orkuveitu Reykjavíkur, um 25.500 krónur.

Í tilkynningu ASÍ með könnuninni er vakin athygli á því að ákveði heimili að skipta um orkufyrirtæki sé líklegt að reikningar berist í tveimur seðlum með tilheyrandi seðilgjaldi. - þj