Hlutur Landsbankastarfsmanna orðinn 1,5 prósent

Sá hlutur í Landsbankanum sem mun fara í að mynda stofn að nýju kaupaukakerfi bankans var 1,5 prósent af öllu hlutafé hans um mitt þetta ár. Miðað við innra virði bankans er virði hlutarins um 3,2 milljarðar króna. Virði skilyrts skuldabréfs, sem ákvarðar hversu stóran hlut starfsmennirnir munu eignast í bankanum, jókst um níu milljarða króna á fyrri hluta þessa árs. Þetta kemur fram í hálfsársuppgjöri Landsbankans sem birt var á fimmtudag.

Í lok árs 2009 var greint frá með hvaða hætti uppgjör nýja Landsbankans og þrotabús forvera hans vegna eigna sem færðar voru yfir til þess nýja myndi verða. Í því fólst að íslenska ríkið eignaðist 81,33 prósenta hlut í nýja bankanum gegn 122 milljarða króna eiginfjárframlagi. Það sem eftir stóð, 18,67 prósenta hlutur, var í eigu þrotabús gamla bankans.

Samhliða var gefið út skilyrt skuldabréf sem gera á upp í árslok 2012. Samkvæmt upplýsingum frá Landsbankanum mun virði þess, sem getur mest verið 92 milljarðar króna, ákvarðast af frammistöðu ákveðinna eigna sem færðar voru inn í nýja bankann. Um er að ræða tvö söfn, annars vegar lán til stærri fyrirtækja og hins vegar lán til smærri fyrirtækja. Í þessum lánasöfnum eru að mestu lán sem keypt voru á lágu verði úr þrotabúinu og voru því talin léleg. Ef virðisaukning á sér stað á lánasöfnunum renna 85 prósent hennar til þrotabús gamla bankans en fimmtán prósent til nýja bankans.

Ef virði skuldabréfsins verður 92 milljarðar króna í lok þessa árs mun þrotabú gamla bankans afsala sér 18,67 prósenta eignarhlut sínum. Þar af mun 16,67 prósenta hlutur renna til Bankasýslu ríkisins, sem mun þá halda á 98 prósenta eignarhlut, en tvö prósent munu fara í að mynda stofn fyrir kaupaukakerfi starfsmanna nýja Landsbankans. Ef sá árangur næðist ekki þá myndi hluturinn sem Bankasýslan og starfsmenn Landsbankans eiga að fá rýrna í beinu hlutfalli við lokavirði skuldabréfsins.

Virði skuldabréfsins um mitt þetta ár var 69 milljarðar króna. Það hefur aukist um níu milljarða á þessu ári og um 42,5 milljarða króna frá því í árslok 2010. Miðað við stöðu þess í dag myndu starfsmenn Landsbankans fá 1,5 prósenta hlut í bankanum. Miðað við eigið fé Landsbankans, sem er 212 milljarðar króna og jókst um milljarða króna á fyrri hluta ársins, er innra virði þess hlutar 3,2 milljarðar króna. Ef virði skuldabréfsins nær 92 milljörðum króna myndi tveggja prósenta hlutur starfsmanna verða rúmlega 4,2 milljarða króna virði. thordur@frettabladid.is