Rannsaka tugi mála varðandi skattaskjól

Yfir sjötíu skattaskjólsmál í tíu skattaskjólum hafa borist skattrannsóknarstjóra frá hruni. Langflest málanna tengjast Lúxemborg, að sögn Bryndísar Kristjánsdóttur skattrannsóknarstjóra. „Það hefur mikið farið í gegnum skattaskjólsfélög stofnuð þar eða í gegnum bankana þar þótt félögin tengist til dæmis Tortóla eða öðrum skattaskjólum," segir Bryndís.

Auk Lúxemborgar og Tortóla, stærstu eyju Bresku Jómfrúareyja, eru Panama, Mön, Jersey, Liechtenstein, Kýpur, Belís, Marshall-eyjar og Delaware í Bandaríkjunum þau skattaskjól sem rannsóknir skattrannsóknarstjóra hafa snert.

Embættið telur að í stærstu málunum hafi ekki verið greiddur skattur af milljörðum króna. „Þetta er frá því að vera tiltölulega lágar fjárhæðir upp í milljarða. Í flestum tilvikum er um að ræða aðila sem hafa fjárhagslega burði til að geyma fé í skattaskjólum og stofna félög þar. Slíkt kostar talsvert," segir Bryndís.

Rannsókn er lokið í rúmlega þrjátíu málum. Tæplega þrjátíu önnur eru til rannsóknar og er rannsókn sumra þeirra langt á veg komin. Til viðbótar bíða tíu til tuttugu mál rannsóknar.

Skattrannsóknarstjóri fær ekki upplýsingar frá Lúxemborg en Bryndís vonast til að það breytist með viðbótum við tvísköttunarsamninginn. Auk upplýsingaskorts hefur skortur á starfsfólki einnig tafið fyrir rannsókn. - ibs