Útlendingar aldrei eytt meira á Íslandi

Erlendir ferðamenn hafa aldrei eytt fleiri krónum á Íslandi og í júlí síðastliðnum. Erlend kortavelta hérlendis var þá um 13,1 milljarður króna og jókst um 15,3 prósent frá sama mánuði í fyrra. Á sama tíma eyddu Íslendingar 5,2 milljörðum króna á kortum sínum í útlöndum, sem er 10,1 prósenti meira en árið 2011. Þetta kemur fram hjá Greiningu Íslandsbanka sem byggir á tölum Seðlabanka Íslands um kortaveltu.

Erlend kortavelta hérlendis er 43 milljarðar króna það sem af er ári. Hún hefur aukist um 11,6 prósent frá sama tímabili í fyrra. Á sama tíma hafa íslenskir ferðamenn eytt 32 milljörðum króna með kortum sínum í útlöndum.

Það stefnir í enn eitt metárið hjá íslenskri ferðaþjónustu. Alls fóru 112.100 erlendir gestir frá landinu um Leifsstöð í júlí, sem er 14,7 prósentum fleiri en í sama mánuði í fyrra.

Brottfarir erlendra ferðamanna eru nú komnar upp í 357 þúsund á fyrstu sjö mánuðum ársins, en þær voru 304.600 á sama tímabili í fyrra. Jafngildir þetta aukningu upp á 17,2 prósent milli ára. Þetta kemur fram í tölum Ferðamálastofu Íslands sem birtar voru í síðustu viku.- þsj