Hagnaðurinn fjórfalt meiri en á síðasta ári

Icelandair Group hagnaðist um 1,7 milljarða króna á öðrum ársfjórðungi þessa árs. Það er rúmlega fjórum sinnum meiri hagnaður en félagið skilaði á sama tíma í fyrra, en hagnaður þess frá byrjun apríl til loka júnímánaðar 2011 var 400 milljónir króna á gengi dagsins í dag. Þetta kemur fram í hálfsársuppgjöri félagsins sem birt var í gær.

Hagnaður fyrir fjármagnsliði og skatta var tæplega 3,5 milljarðar króna og jókst um 1,4 milljarða króna á milli ára.

Þegar horft er á fyrstu sex mánuði ársins hefur Icelandair Group hagnast um 135 milljónir króna, en félagið skilar vanalega tapi á fyrsta ársfjórðungi enda markaðir þess í lægð á þeim tíma. Á fyrstu sex mánuðum ársins 2011 tapaði Icelandair Group hins vegar um 695 milljónum króna. Því er um 730 milljóna króna viðsnúning að ræða frá síðasta ári.

Í tilkynningu frá Icelandair Group er haft eftir Björgólfi Jóhannssyni, forstjóra félagsins, að afkoma þess á öðrum ársfjórðungi hafi verið góð og talsverð betri en á sama tímabili í fyrra. „Arðbær innri vöxtur einkenndi fjórðunginn og þá sérstaklega í millilandaflugi félagsins. Farþegum fjölgaði mikið og einkum á markaðinum milli Evrópu og Norður-Ameríku. Einnig var töluverður vöxtur á ferðamannamarkaðinum til Íslands sem hefur jákvæð áhrif á rekstur samstæðunnar og alla íslenska ferðaþjónustu.“

Icelandair Group er skráð á hlutabréfamarkað. Stærstu eigendur félagsins eru Framtakssjóður Íslands (19 prósent), Lífeyrissjóður verslunarmanna (14,3 prósent) og Íslandsbanki (11,7 prósent). - þsj