Fjarðarkaup hagnast um 150 milljónir - skuldar ekkert

Aðeins einu sinni í tæplega fjörutíu ára sögu Fjarðarkaupa hefur verið tekið lán, og var því skilað nánast samstundis, þar sem eigendunum leist ekkert á vaxtakostnaðinn. Verslunin var rekin með 150 milljóna króna hagnaði í fyrra, og segja verslunarstjórar lykilinn að góðu gengi vera að halda í einfaldar venjur.

Verslunin Fjarðarkaup hefur verið fastur punktur í tilverunni í Hafnarfirði í tæplega fjörutíu ár, en á næsta ári fagnar verslunin fjörutíu ára afmæli sínu.

Rekstur Fjarðarkaupa hefur alltaf gengið vel og ber nýjasti ársreikningur verslunarinnar, fyrir árið í fyrra, þess merki.

Hagnaður Fjarðarkaupa var ríflega 150 milljónir í fyrra, en eigið fé félagsins nemur ríflega tveimur og hálfum milljarði króna.

Ólíkt mörgum öðrum fyrirtækjum í íslensku atvinnulífi er fyrirtækið skuldlaust.

Gísli Sigurbergsson, verðlagsstjóri Fjarðarkaupa og sonur Sigurbergs Sveinssonar sem er eigandi verslunarinnar, segir að galdurinn við góðan árangur verslunarinnar sé fremur einfaldur. „Það þarf sinna versluninni vel, og vera mikið á staðnum. Það þarf allt að ganga vel fyrir sig. Svo þarf að vera með gott starfsfólk, sem veit hvað það er að gera. Okkur hefur boðið gæfa til þess að vera með gott starfsfólk. "

Gísli segir enn fremur að lagt hafi verið upp það frá upphafi reka alltaf eina búð, og hlúa vel að henni og viðskiptavinunum. Þannig hafi tekist að viðhalda metnaðarfullri búð frá ári til árs, með því að halda í einfaldar venjur.

Það hjálpi síðan líka til að fjármagnskostnaður hafi enginn verið frá upphafi.

„Það var tekið lán í upphafi, þegar búðin var flutt, en því var skilað strax þar sem vaxtakostnaðurinn var svo hár. Frá upphafi rekstursins hafa því aldrei verið neinar langtímaskuldir í fyrirtækinu," segir Gísli.