Seðlabanki þarf ekki að upplýsa um virðið

Úrskurðarnefnd um upplýsingamál hefur staðfest ákvörðun Seðlabanka Íslands um að synja beiðni Markaðarins um upplýsingar um hvert bókfært virði seljendaláns bankans til nýrra eigenda hins danska banka FIH var um síðustu áramót.

Í rökstuðningi sínum fyrir afhendingu gagnanna benti Markaðurinn á að Seðlabankinn hefði þegar greint frá bókfærðu virði lánsins á heimasíðu sinni þegar það var veitt í september 2010. Því væri ekki verið að biðja um nýjar upplýsingar heldur uppfærslu á áður birtum upplýsingum.

Seðlabankinn taldi sig á hinn bóginn bundinn þagnarskyldu. Á það féllst úrskurðarnefndin eftir að hafa fengið afhenta greinargerð frá Seðlabankanum þar sem fjallað var um „stöðu á skuldabréfi sem tengist sölu á danska bankanum FIH og samninga sem staðið hefur verið að um breytingar og/eða uppgjör þess“. Í úrskurði hennar segir að „af efni þeirra er óhjákvæmilegt annað en að fallast á að þær falli undir sérstakt þagnarskylduákvæði 34. gr. Laga [...] um Seðlabanka Íslands“.

Alls var seljendalánið upp á 3,1 milljarð danskra króna, eða um 66 milljarða króna á gengi dagsins í dag. Ljóst er að það er tapað að mestu en hversu mikið, ef eitthvað, fæst til baka kemur ekki í ljós fyrr en á árinu 2015.

Bankastjóri FIH, Bjarne Graven Larsen, sagði í samtali við FinansWatch í júní að litlar líkur væru á að Seðlabankinn fengi eitthvað upp í lánið. - þsj