Landsbankinn var á móti kaupum bræðranna

Hópur hluthafa Í Bakkavör Group var á móti því að bræðurnir Ágúst og Lýður Guðmundssynir myndu fá að kaupa allt að 25 prósenta hlut í félaginu í gegnum hlutafjáraukningu fyrir um fjóra milljarða króna.

Kaupverðið er töluvert undir matsvirði Bakkavarar Group, en hlutafé félagsins er talið 20-40 milljarða króna virði. Á móti myndi hlutur annarra hluthafa þynnast út.

Einn af þeim aðilum sem var mótfallinn samkomulaginu var Landsbankinn. Þetta staðfestir Kristján Kristjánsson, upplýsingarfulltrúi bankans, í samtali við Fréttablaðið.

Hann segir bankann hafa setið hjá í atkvæðagreiðslu um málið.

Í samkomulaginu fólst að íslenskir kröfuhafar Bakkavarar Group myndu eignast félagið að mestu. Á sama tíma myndi falla úr gildi hluthafasamkomulag sem tryggði bræðrunum meirihluta í stjórn Bakkavarar Group. Á móti var samþykkt að þeir gætu keypt ofangreindan hlut.

Hópur minni hluthafa var þó á móti þeim hluta samkomulagsins sem tryggði bræðrunum hlut í félaginu að nýju.

Að sögn Kristjáns var Landsbankinn mjög óánægður með það verð sem bræðrunum bauðst í hlutafjáraukningunni og marglýsti hann andstöðu sinni við þann hluta samkomulagsins.

Hlutur bankans hafi þó einungis verið tvö prósent og því hafi hann ekki verið afgerandi við afgreiðslu málsins.

Ferlið hefur verið leitt af Arion banka, sem var stærsti einstaki kröfuhafi Bakkavarar Group.

- þsj