Glitnir vill fá fjórtán milljarða frá Stoðum

Slitastjórn Glitnis hefur stefnt Stoðum, sem áður hétu FL Group, til að greiða sér fjórtán milljarða króna auk dráttarvaxta. Auk þess vill slitastjórnin að ráðstöfun Stoða á fyrsta veðrétti í hollenska félaginu Ferskur Holding 1 BV, sem á meðal annars hlut í Refresco, frá því í maí 2008 verði rift.

Þá var veðréttur Glitnis í félaginu gefinn eftir til að Stoðir gætu veðsett Landsbanka Íslands fyrir frekari lántökum. Slitastjórnin vill meina að umrædd aðgerð hafi verið svokallaður örlætisgerningur.

Þetta staðfestir Júlíus Þorfinnsson, framkvæmdastjóri Stoða. Hann segir félagið enn eiga eftir að taka sér tíma til að fara yfir málið. „Í fljótu bragði, enn sem komið er, þá sjáum við ekki að þetta eigi við rök að styðjast.“

Málið snýst um 15 milljarða kúlulán sem Glitnir veitti Stoðum í desember 2007 og átti að vera til þriggja ára. Sem veð fyrir láninu fékk Glitnir fyrsta veðrétt í hollenska félaginu Ferskur Holding 1 BV., sem átti um 40 prósenta hlut í evrópska drykkjarframleiðandanum Refresco. Í mars 2008 veitti Glitnir síðan Stoðum nýtt lán upp á fjóra milljarða króna þar sem veðið var meðal annars umrædd hlutabréf í Ferskur Holding 1 BV.

Í maí 2008 var hins vegar samþykkt að aflétta umræddum veðum gegn því að hann fengi veð í fasteignaverkefnum í Bandaríkjunum í staðinn, sem síðar reyndist verðlaust. Eign Stoða í Ferskur Holding 1 BV var síðan samstundis veðsett Landsbankanum í staðinn fyrir ný lán.

Stoðir fóru í greiðslustöðvun strax eftir bankahrun, enda var félagið stærsti einstaki eigandi hins fallna Glitnis. Nauðasamningur félagsins var samþykktur í júní 2009. Þar var samþykkt að allir óveðtryggðir kröfuhafar myndu fá uppgerðar kröfur með einnar milljón króna eingreiðslu og að fimm prósent af viðbótarkröfunni fengist greitt með almennum hlutum í Stoðum. Júlíus segir að sú afgreiðsla myndi eiga við ef Stoðir myndu tapa málinu á hendur Glitni. thordur@frettabladid.is