Landsbankinn hækkar vexti á óverðtryggðum lánum

Landsbankinn hefur hækkað vexti á óverðtryggðum húsnæðislánum sínum. Óverðtryggðir vextir sem eru fastir í þrjú til fimm ár eru nú 7,0 til 7,3 prósent. Þeir voru 6,4 til 6,6 prósent þegar lánin voru kynnt síðastliðið haust. Breytilegir óverðtryggðir vextir á húsnæðislánum bankans eru nú 6,5 prósent en voru 5,9 prósent þegar þeir voru sem lægstir. Hækkanirnar eru afleiðing af stýrivaxtahækkun Seðlabanka Íslands sem hafa hækkað um 0,75 prósentustig á skömmum tíma. Þeir eru nú 5,5 prósent.

Arion banki, sem býður einvörðungu upp á fasta óverðtryggða vexti til fimm ára, hækkaði vexti sína sama dag og stýrivaxtahækkun Seðlabankans var kynnt í síðustu viku. Þeir fóru þá í 7,45 prósent, en voru upphaflega 6,45 prósent þegar lánin voru kynnt í fyrrahaust.

Íslandsbanki hækkaði óverðtryggða vexti sína eftir stýrivaxtahækkunina í mars og eru föstu vextirnir, sem eru fastir í þrjú ár, nú 6,55 prósent og breytilegu vextirnir 5,65 prósent. Samkvæmt upplýsingum frá bankanum verður ný vaxtatafla kynnt um komandi mánaðamót og þá mun koma í ljós hvort bankinn fylgi fordæmi hinna.

MP banki býður einvörðungu upp á breytilega vexti og eru þeir 5,65 prósent í dag. Þeir hafa ekki hækkað eftir stýrivaxtahækkunina. - þsj