Helmingur félaga í fangi banka til sölu

Alls voru 116 félög í óskyldum rekstri í eigu viðskiptabanka í byrjun þessa mánaðar. Þau voru 132 í byrjun nóvember 2011 og hefur því fækkað um 16 síðan þá.

Alls hafa bankar átt, að hluta eða í heild, 193 félög í tímabundinni starfsemi frá miðju síðasta ári. Þar af hafa þeir átt 179 þeirra lengur en í tólf mánuði. Á því tímabili hafa bankarnir losað um eignarhald á 77 félögum en 55 ný hafa bæst við. Þetta kom fram á kynningarfundi sem Fjármálaeftirlitið (FME) hélt í gær um stöðu og horfur viðskiptabankanna.

Samkvæmt lögum mega fjármálafyrirtæki einungis eiga félög í óskyldum rekstri í 12 mánuði hið mesta án þess að leita eftir undanþágu vegna eignarhaldsins. Af þeim félögum sem voru í eigu banka 1. maí síðastliðinn eru einungis 14 innan upphaflegra tímamarka en frestir hafa verið veittir vegna 102 þeirra.

Af þeim félögum sem bankar halda á í dag og eru á undanþágu frá FME eru 57 í söluferli, 32 eru í slitaferli, tíu eru með umsókn í skoðun hjá FME og þrjú eru í endurskipulagningarferli. Í nóvember voru einungis 10,6 prósent þeirra félaga sem bankarnir héldu á í söluferli. Nú er tæpur helmingur þeirra í slíku ferli. Af þeim félögum sem bankarnir hafa losað um hefur 41 verið selt, 23 verið slitið og átta hafa verið sett í þrot.

Samkeppniseftirlitið (SE) hefur gagnrýnt yfirráð banka yfir félögum sem lent hafa í vandræðum. Í skýrslu sem það birti í lok mars kom fram að það telji bankana vera í ráðandi stöðu í 27 prósentum af 120 stærstu félögum landsins. Enn fremur gagnrýndi SE að íslensk félög kæmu allt of skuldsett út úr fjárhagslegri endurskipulagningu og að óvíst væri að mörg þeirra gætu staðið undir henni.

Á fundinum staðfesti Halldóra Elín Ólafsdóttir, framkvæmdastjóri eftirlits FME, að sum þeirra félaga sem lokið hafi fjárhagslegri endurskipulagningu innan bankanna væru komin aftur í vanskil. Of snemmt væri hins vegar að birta upplýsingar um slíkt.

Vanskilahlutfall íslensku bankanna er mjög hátt, eða 13,5 prósent. Það var sett í samhengi við vanskil fimm erlendra banka á fundinum í gær, en vanskilahlutföll þeirra voru á bilinu 0,5 til 5,8 prósent.

thordur@frettabladid.is