Þjóðhagsstofnun endurreist en SÍ og FME ekki sameinuð

Öll stjórnsýsla sem tengist peningastefnu landsins, þar með talinn Seðlabanki Íslands, verður færð undir fjármálaráðuneytið, gangi hugmyndir um breytingar á ráðuneytum eftir. Þar með hefur verið fallið frá hugmyndum um sameiningu Seðlabankans og Fjármálaeftirlitsins, en það síðarnefnda verður á forræði nýs atvinnuvegaráðuneytis.

Samkvæmt þingsályktunartillögu Jóhönnu Sigurðardóttur um skiptingu ráðuneyta verða verkefni færð til og ráðuneyti stofnuð þannig að þrjú ný ráðuneyti verði til: Atvinnuvega- og nýsköpunarráðuneyti, umhverfis- og auðlinda-ráðuneyti og fjármála- og efnahagsráðuneyti. Ríkisstjórnin hefur síðan unnið að tilfærslu verkefna innan ráðuneytanna.

Samkvæmt heimildum Fréttablaðsins verður niðurstaðan sú að efnahagsþátturinn verði byggður upp í fjármálaráðuneytinu. Þangað færist Seðlabankinn og allt sem tengist peningamálastefnu. Samfylkingin hefur lagt mikla áherslu á þessa skipan mála.

Þá verði komið á fót nýrri stofnun, í ætt við Þjóðhagsstofnun sem lögð var niður árið 2002, sem vinni þjóðhagsspár.

Málefni atvinnulífsins alls, þar með talinn fjármálamarkaðurinn, færast undir atvinnuvegaráðuneytið. Þar verður einnig eftirlitsiðnaðurinn, Fjármálaeftirlitið og samkeppniseftirlitið, svo eitthvað sé nefnt. Stefnt er að áframhaldandi eflingu FME.

Nýtt umhverfis- og auðlinda-ráðuneyti mun fá það hlutverk að tryggja sjálfbæra nýtingu auðlinda. Það verður því í mikilli samvinnu við atvinnuvegaráðuneytið.

Nokkuð hefur verið rætt um hvernig stofnanir núverandi ráðuneyta munu skiptast á milli þeirra nýju. Samkvæmt heimildum Fréttablaðsins mun Hafrannsóknastofnun verða á forræði atvinnuvegaráðuneytis, en umhverfisráðuneytið fá aðkomu að stefnumótun. Kvótaúthlutunin verður þó á ábyrgð atvinnuvega-ráðherra. Hins vegar hefur verið rætt um að Veiðimálastofnun færist yfir til umhverfisráðuneytis.

Þingsályktunartillagan er nú til umfjöllunar í stjórnkerfis- og eftirlitsnefnd, en gert er ráð fyrir að breytingarnar taki gildi 1. september.

- kóp