Ákærður fyrir sendiráðsfléttu

Sérstakur saksóknari hefur gefið út ákæru á hendur athafnamanninum Aroni Pétri Karlssyni fyrir fjársvik vegna sölu á stórhýsi við Skúlagötu til Kínverska alþýðulýðveldisins í janúar 2010. Í húsinu er nú sendiráð Kínverja hér á landi.

Samkvæmt ákærunni hlunnfór Aron Pétur Arion banka, Glitni og Íslandsbanka um 300 milljónir með sölunni. Bankarnir þrír áttu veðrétt í húsinu fyrir samtals rúman milljarð króna.

Eigendur, Aron og faðir hans, Karl Steingrímsson í Pelsinum, kynntu bönkunum 575 milljóna króna kauptilboð í húsið frá indversku fyrirtæki og bönkunum leist ágætlega á tilboðið miðað við ástandið á fasteignamarkaði þótt það væri langtum lægra en veðkröfurnar. Því var fallist á að húsið yrði selt og afgangi skuldanna aflétt.

Í ljós kom hins vegar að húsið var selt kínverska ríkinu undir sendiráðsbústað og að verðið hafi ekki verið 575 milljónir heldur 870 milljónir. Kaupin höfðu gengið í gegn áður en skuldunum var aflétt.

Grunur er um að tilboð Indverjanna hafi verið sýndartilboð, lagt fram til að eigendurnir gætu hagnast um tæpar 300 milljónir.

Feðgarnir voru yfirheyrðir vegna málsins á sínum tíma, auk lögmannsins Gísla Gíslasonar, sem var tengiliður við Indverjana, og fasteignasalans Guðmundar Th. Jónssonar. Grunur féll á þá tvo síðastnefndu vegna þess að samtals fengu þeir tæpar 70 milljónir í þóknun vegna aðkomu sinnar að viðskiptunum. Aron er hins vegar einn ákærður.

Bankarnir gera samtals um 150 milljóna króna bótakröfu í málinu.

- sh