Árni Páll styður ekki fækkun ráðuneyta

Tekist var á um fyrirhugaða fækkun ráðuneyta á Alþingi í gær. Árni Páll Árnason er á móti því að leggja niður efnahags- og viðskiptaráðuneytið. Forsætisráðherra vonast eftir stuðningi út fyrir raðir þingmanna ríkisstjórnarinnar.

Í umræðum um breytta skipan ráðuneyta í Stjórnarráði Íslands komu fram í máli stjórnarandstöðuþingmanna efasemdir um að ríkisstjórnin hafi meirihluta fyrir áframhaldandi breytingum og fækkun ráðuneyta. Jóhanna Sigurðardóttir forsætisráðherra mælti fyrir þingsályktunartillögu um málið.

Breytingarnar fela í sér að í stað iðnaðarráðuneytis, sjávarútvegs- og landbúnaðarráðuneytis, umhverfisráðuneytis, efnahags- og viðskiptaráðuneytis og fjármálaráðuneytis komi þrjú ráðuneyti: atvinnuvega- og nýsköpunarráðuneyti, fjármála- og efnahagsráðuneyti og umhverfis- og auðlindaráðuneyti. Ráðuneytum fækkar úr tíu í átta.

Árni Páll Árnason, þingmaður Samfylkingar, sem til áramóta gegndi embætti efnahags- og viðskiptaráðherra, kvaðst í umræðunum andvígur því að leggja niður efnahags- og viðskiptaráðuneytið og kvaðst ekki munu styðja það. Hann sagði málið vanreifað og órökstutt.

„Verið er að endurvekja togstreituhættu milli ólíkra eftirlitsstofnana,“ sagði hann og kvað ljóst að breytingin gengi gegn bæði stjórnarsáttmála ríkisstjórnarinnar og markmiðum um samstillta hagstjórn. Í kynningu á tillögunni benti Jóhanna hins vegar á að málið hefði verið samþykkt einróma í ríkisstjórn og því vísað til þingflokka þar sem það hefði verið staðfest og vísað til þingsins. „En ég geri líka ráð fyrir að einstakir þingmenn gætu eitthvað haft að athuga við einstaka liði og viljað ná fram breytingum,“ sagði hún. Um leið kvaðst hún hafa trú á því að þingmenn sæju kosti þess að koma á breytingunum þegar frumvarpið væri skoðað í heild sinni. Þannig kvaðst forsætisráðherra eiga von á því að frumvarpið nyti stuðnings meirihluta þingmanna, líka út fyrir raðir stjórnarflokkanna.

Svandís Svavarsdóttir umhverfisráðherra benti á að breytingar í tengslum við stofnun umhverfis- og auðlindaráðuneytis væru í takti við það sem gerðist á heimsvísu um hvernig auðlindanýtingu væri fyrir komið.

Steingrímur J. Sigfússon efnahags- og viðskiptaráðherra benti á að fyrri breytingar hefðu heppnast vel. „Reynslan frá innanríkis- og velferðarráðuneyti sýnir að hægt er að standa vel að þessum málum. Ég tel að við eigum af kjarki að halda áfram á þessari braut og ljúka boðuðum breytingum á stjórnarráðinu.“ olikr@frettabladid.is