Ný aðferðafræði við eldi í sjó lofar góðu

Fjarðalax slátrar tíu til tólf tonnum af laxi á viku úr fyrstu kynslóð seiða í Tálknafirði. Fyrirtækið hyggst framleiða 10.000 tonn af laxi á ári. Forsvarsmenn óttast að stjórnsýslan meðtaki ekki rök þeirra fyrir nýju eldismódeli.

Fiskeldisfyrirtækið Fjarðalax, sem stundar eldi á sunnanverðum Vestfjörðum, slátrar þessa dagana tíu til tólf tonnum af laxi úr eldiskvíum í Tálknafirði í viku hverri. Þriðja kynslóð laxaseiða verða sett í sjó í Patreksfirði í sumar en önnur kynslóð dafnar vel í Arnarfirði og verður laxinn þar kominn í sláturstærð síðar á þessu ári. Starfsmenn fyrirtækisins verða að vonum orðnir 60 á næsta ári og 130 til 150 ef takmark fyrirtækisins um tíu þúsund tonna ársframleiðslu næst.

Fjarðalax styðst við nýtt eldismódel sem byggir á eldi í þremur aðskildum fjörðum, með drjúgan hvíldartíma á hverju svæði á milli hverrar kynslóðar. „Einungis þannig er hægt að nánast útiloka óæskileg áhrif á náttúru og lífríki fjarðanna sem um ræðir og draga úr líkum á sýkingum í eldislaxi og lúsagengd,“ segir Höskuldur Steinarsson framkvæmdastjóri. „Fái hver fjörður hvíld á milli kynslóða er ekki ástæða til að óttast áhrif eldisins á lífríki þeirra. Hér fer hagur náttúrunnar og fyrirtækjanna í sjókvíaeldi saman.“

Arnarlax hefur áform um laxeldi í Arnarfirði en hefur ekki ennþá tilskilin leyfi. Aðspurður hvort pláss sé fyrir bæði fyrirtækin í firðinum segir Höskuldur: „Þú færð ekki fjárfesta eða annað inn í svona fyrirtæki fyrir minna en tíu þúsund tonna framleiðslu. Þetta er langtímaverkefni með þolinmótt fjármagn og sterka menn. Þetta gera ekki tvö fyrirtæki í Arnarfirði samtímis,“ segir Höskuldur.

Höskuldur segir að nokkuð erfiðlega hafi gengið að koma sýn Fjarðalaxmanna á framfæri innan stjórnsýslunnar; þeirra sem fara með vald til að veita leyfi til eldis. „Við höfum verið að reyna að koma okkar sjónarmiðum að til að tryggja greininni vaxtarmöguleika í framtíðinni. Leyfi stjórnvöld mörg leyfi á sama svæði þá fer þetta einfaldlega bara á einn veg.“

Höskuldur segir, og vill þar gæta sanngirni, að mikil umræða hafi farið fram innan stjórnsýslunnar og þegar liggi fyrir reglugerð hjá ráðherra sem tekur á fjarlægðarmörkum í fiskeldi með strangari hætti en áður. Hún er ekki tæmandi en er skref í rétta átt, án vafa. „Hún hefur tafist í útgáfu og var ekki afgreidd frá ráðherra síðast þegar ég vissi.“

Samkvæmt upplýsingum Fréttablaðsins frá sjávarútvegs- og landbúnaðarráðuneytinu þá stendur til að undirrita reglugerðina í dag en með henni breytist fleira en fjarlægðarmörkin. Reglugerðin segir til um frekari aðkomu Hafrannsóknastofnunar og yfirdýralæknis fisksjúkdóma að ákvarðanatöku með stjórnsýslustofnunum.

svavar@frettabladid.is