Samstaða um aðskilnað viðskipta- og fjárfestingarbanka

Full samstaða er um það á Alþingi að aðskilja beri viðskiptabanka- og fjárfestingarbankastarfsemi. Fjórtán þingmenn úr öllum flokkum nema Sjálfstæðisflokknum hafa lagt fram þingsályktunartillögu um málið. Það er einnig einn liður í efnahagstillögum Sjálfstæðisflokksins sem allir þingmenn flokksins mæltu fyrir og er til umfjöllunar í efnahags- og viðskiptanefnd.

„Ég held að það séu eiginlega allir sammála um að það eigi að drífa í þessu núna. Spurningin sem stendur eftir er einfaldlega sú hvort þetta eigi að gera með aðgreindum stofnunum eða þá innan fjármálastofnana," segir Álfheiður Ingadóttir, þingmaður Vinstri grænna, sem er fyrsti flutningsmaður tillögunnar.

Samkvæmt tillögunni ályktar Alþingi að fela efnahags- og viðskiptaráðherra að skipa nefnd sem skila á tillögum um hvernig standa skuli að málinu. Markmiðið er að lágmarka áhættu þjóðarbúsins vegna áfalla í rekstri banka en nefndin skal skila tillögum sínum fyrir 1. október næstkomandi.

Í greinargerð sem fylgir tillögunni segir að innlán viðskiptabanka, sem hafa bakábyrgð frá ríkinu, hafi í aðdraganda bankahrunsins verið notuð í glæfralegar og jafnvel óarðbærar fjárfestingar, meðal annars í fyrirtækjum nátengdum viðkomandi fjármálastofnunum. Vegna þeirrar sérstöku tryggingar sem innlán njóti sé rík ástæða til að aðskilja hefðbundna bankastarfsemi frá áhættusækinni fjárfestingarstarfsemi.

Ragnheiður Elín Árnadóttir, þingflokksformaður Sjálfstæðisflokksins, segir að þingmenn flokksins muni vitaskuld taka vel í málið þegar það komi til kasta þingsins. Þeir hafi hins vegar talið óþarfi að vera meðflutningsmenn að þessari tilteknu tillögu þar sem kveðið sé á um aðskilnað viðskipta- og fjárfestingarbankastarfsemi í efnahagstillögum flokksins sem eru eins og áður sagði til umfjöllunar í efnahags- og viðskiptanefnd.

„Okkar vilji til þess að þetta verði skoðað hefur komið fram þar og allir okkar þingmenn eru flutningsmenn að þeim tillögum," segir Ragnheiður Elín að lokum.

-mþl