Ákvörðun tekin á næstu dögum

Frestur til að skila bindandi tilboðum í hlut þrotabúa Landsbankans, sem á 67%, og Glitnis, sem á 10%, í Iceland Foods rann út á þriðjudagskvöld.

Söluferlið hefur staðið yfir um nokkurra mánaða skeið. Alþjóðlegu stórbankarnir UBS og Bank of America Merril Lynch hafa haft umsjón með því og veitt þrotabúunum ráðgjöf.

Í breskum fjölmiðlum hefur því verið haldið fram að þau vilji fá hátt í 1,2 milljarða punda, um 224 milljarða króna, fyrir hlut sinn. Páll Benediktsson, upplýsingafulltrúi þrotabús Landsbankans, segist ekkert geta gefið upp um hversu mörg eða há tilboðin voru né hverjir það voru sem skiluðu þeim inn.

Reuters-fréttastofan greindi frá því í gær að búist hafi verið við því að fjárfestingasjóðirnir Bain Capital og BC Partners myndu skila inn tilboðum. Þá hafi verið áhugi til staðar hjá Wm Morrison-matvörukeðjunni að kaupa hlutinn auk þess sem Malcolm Walker, forstjóri og minnihlutaeigandi í Iceland, hefur unnið að því að koma saman tilboðshóp.

Samkvæmt upplýsingum Fréttablaðsins munu stjórnendur þrotabúanna, ásamt ráðgjöfum sínum, nú taka sér nokkra daga til að fara yfir hvort tilboðin sem skilað var inn séu þess eðlis að vert sé að fara í frekari viðræður. Komist þeir að því að svo sé munu frekari viðræður fara fram. Enn er ekki útilokað að hætt verði við söluna.

Iceland Foods er langstærsta seljanlega eign þrotabús Landsbankans. Keðjan er með um 2,1% markaðshlutdeild í Bretlandi og selur vörur árlega fyrir á fimmta hundrað milljarða króna. - þsj