Breytist í takt við breytt heilsufar þjóðarinnar

Stoðtækjafyrirtækið Stoð hf. heldur upp á þrjátíu ára afmæli á þessu ári. Til að halda upp á tímamótin stendur fyrirtækið fyrir opnum fræðslufundum allt árið og fer sá fyrsti fram í dag.

„Við ætlum að segja frá helstu stoð- og hjálpartækjum í þessum fyrirlestrum sem eru opnir öllum en eru einkum ætlaðir fólki úr heilbrigðisgeiranum, svo sem sjúkraþjálfurum og iðjuþjálfum, og svo viljum við gjarnan sjá nemendur í þessum greinum líka,“ segir Elías Gunnarsson framkvæmdastjóri fyrirtækisins.

„Þeir Sveinn Finnbogason og Þórir Jónsson stoðtækjafræðingar ríða á vaðið með fyrirlestrinum „Stutt við bakið“ sem fjallar um helstu lausnir í bakbeltum og bolspelkum. Fyrirlestrarnir verða alls ellefu á árinu og fjalla um stoðtæki frá ýmsum sjónarhornum,“ segir Elías en þess má geta að fyrirlestrarnir fara fram hjá Stoð í Trönuhrauni 8.

Fyrirtækið Stoð var stofnað árið 1982 af tveimur stoðtækjafyrirtækjum og hefur vaxið hægt og bítandi. „Við höfum alla tíð einbeitt okkur að stoðtækjum ýmiss konar, spelkum og gervilimum. Á árunum 2000 til 2002 stofnuðum við svo nýja deild hér sem sér um hjálpartæki ýmiss konar og í kjölfar þess stækkaði fyrirtækið.“

Elías segir helstu breytingarnar sem hafa orðið á starfsemi fyrirtækisins undanfarin 30 ár tengjast breytingum á heilsufari þjóðarinnar. „Lömunarveiki og klofinn hryggur þekkjast til dæmis ekki lengur og ekki þarf því að aðstoða fórnarlömb þeirra. En aðrir sjúkdómar hafa tekið við eins og sykursýki og offita. Svo eldist þjóðin vitanlega.“

Frekari upplýsingar um afmælisdagskrá fyrirtækisins og fyrirlestra er að finna á heimasíðu fyrirtækisins stod.is.

sigridur@frettabladid.is