Hlutur í Íslandsbanka í söluferli

Viðskipti Þrotabú Glitnis er með hlut sinn í Íslandsbanka í söluferli. Þetta kemur fram í tillögu um greiðslu forgangskrafna úr þrotabúinu sem send var kröfuhöfum Glitnis í gær. Glitnir á 95% hlut í Íslandsbanka sem nýverið sameinaðist Byr.

Orðrétt segir í tillögunni að „Ferli er í gangi vegna hugsanlegrar sölu hlutafjár Glitnis í Íslandsbanka. Ekki er vitað hvort Íslandsbanki verði seldur í íslenskum krónum eða í öðrum gjaldmiðlum eða hvort hann verði yfirleitt seldur".

Svissneski bankinn UBS hefur aðstoðað Glitni í umræddu söluferli. Allmargir erlendir bankar hafa sýnt áhuga á að kaupa Íslandsbanka. Heimildir Fréttablaðsins herma að á meðal þeirra séu kanadískir og norskir bankar.

Steinunn Guðbjartsdóttir, formaður slitastjórnar Glitnis, segir ekkert fast í hendi varðandi söluna á Íslandsbanka. Hún sé einfaldlega í ferli. „Það hefur lengi verið í athugun hvort hægt sé að selja Íslandsbanka. Það er í skoðun og enn alveg óvíst hvort það tekst eða ekki."

Slitastjórn Glitnis tilkynnti kröfuhöfum sínum í gær að hún ætlaði sér að greiða út allar forgangskröfur í búið fyrir lok febrúar næstkomandi. Um er að ræða fyrstu útgreiðslur til kröfuhafa Glitnis. - þsj