Slitastjórn greiðir út 106 milljarða kröfur

Forgangskröfuhafar í þrotabú Glitnis munu fá kröfur sínar greiddar fyrir febrúarlok samkvæmt tillögu slitastjórnar. Heildarvirði þeirra er 106 milljarðar króna. Um 60% upphæðarinnar fara inn á geymslureikninga vegna ágreinings.

Slitastjórn Glitnis hefur tilkynnt kröfuhöfum sínum að hún ætli sér að greiða út 105,8 milljarða króna til forgangskröfuhafa í bú bankans. Um er að ræða samþykktar forgangskröfur upp á 45,3 milljarða króna og forgangskröfur sem enn eru í ágreiningi upp á 60,5 milljarða króna sem lagðar verða inn á greiðslureikninga þar til að ágreiningurinn verður leystur. Komi ekki fram mótmæli munu greiðslurnar verða inntar af hendi fyrir 29. febrúar næstkomandi. Um er að ræða fullnaðargreiðslu til forgangskröfuhafa og fyrstu greiðslu sem greidd verður út úr þrotabúi Glitnis. Þetta kemur fram í tillögu um greiðslur til forgangskröfuhafa sem send var út í gær.

Í bréfinu er kröfuhöfum gefið tækifæri til að koma á framfæri mótmælum gagnvart tillögunni fyrir næsta kröfuhafafund Glitnis sem haldinn verður 31. janúar næstkomandi.

Steinunn Guðbjartsdóttir, formaður slitastjórnar bankans, segir útgreiðsluna nú gerlega eftir að Hæstiréttur komst að þeirri niðurstöðu í október síðastliðnum að svokölluð heildsöluinnlán væru forgangskröfur í bú bankans. Þorri samþykktra forgangskrafna hans eru heildsöluinnlán. „Staðreyndin er sú að Glitnir á meira en nóg fyrir forgangskröfum. Það ber að greiða þær um leið og það er hægt. Meginþorri þeirra krafna sem eru endanlegar hjá okkur og við getum greitt beint til kröfuhafanna eru heildsöluinnlán.“

Öllum kröfum sem lýst var við slitameðferð Glitnis var umbreytt í íslenskar krónur á sölugengi Seðlabanka Íslands 22. apríl 2009. Allar skuldbindingar Glitnis eru því í íslenskum krónum. Þeim peningalegu eignum sem þrotabúið hefur innheimt er þó haldið í þeim gjaldmiðlum sem innheimtast hverju sinni og skuldbindingarnar verða gerðar upp með körfu gjaldmiðla.

Alls verða kröfurnar greiddar út í fimm mismunandi gjaldmiðlum: íslenskum krónum (19,08% hverrar greiðslu), norskum krónum (35,66%), dollurum (17,39%), breskum pundum (11,67%) og evrum (35,66%).

thordur@frettabladid.is