Tapaði 1,4 milljörðum á því að selja HS Orku

Geysir Green Energy tapaði yfir milljarði króna á því að selja hlut sinn í HS Orku. Magma greiddi meðal annars með 7,9% hlut í sjálfu sér. Félagið gerði kyrrstöðusamning við Íslandsbanka. Það ætlar að ljúka sölu eigna á árinu 2012.

Geysir Green Energy (GGE) tapaði 1,4 milljörðum króna á sölu á 57,4% hlut sínum í HS Orku í maí 2010. Hluturinn var seldur til Magma Energy sem greiddi meðal annars fyrir hann með 7,9% hlut í sjálfu sér. Alls er bókfært söluverð hlutarins 14,9 milljarðar króna, sem er töluvert lægri tala en sagt var frá í tilkynningu þegar salan fór fram. Þetta kemur fram í skýringum með ársreikningi GGE sem Fréttablaðið hefur undir höndum. GGE tapaði 5,5 milljörðum króna á árinu 2010.

Þar segir einnig að GGE hafi gert kyrrstöðusamning (e. stand-still agreement) við helsta lánardrottinn sinn, Íslandsbanka, um að bankinn muni ekki gjaldfella skuldir félagsins fyrr en í fyrsta lagi í lok júní 2011. Síðan segir: „eigendur og stjórn félagsins munu á árinu 2011 endurskipuleggja eignir og skuldir félagsins í samvinnu með lánadrottnum félagsins með það að markmiði að hámarka virði eigna félagsins. Vegna mikilla skulda Geysir Green Energy ehf. er framtíð þess óviss og í höndum lánadrottna félagsins“.

Spurður hvar þessi mál standa í dag segir Alexander Guðmundsson, forstjóri GGE, að félagið hafi verið að selja eignir, sú sala hafi gengið vel og reiknað sé með að henni verði lokið árið 2012. „Verðmætustu eignir félagsins voru hlutabréfin í HS Orku sem seld voru til Magma Energy Sweden árið 2010 og svo allt hlutafé Jarðborana sem Íslandsbanki leysti til sín og færði til Miðengis, en Jarðboranir eru nú í söluferli.“

Í ársreikningnum kemur fram að 57,4% hlutur GGE í HS Orku hafi verið seldur til Magma Energy í maí 2010 á 14,9 milljarða króna. Í tilkynningu vegna sölunnar á sínum tíma var kaupverðið sagt „um 16 milljarðar króna“. Bókfært tap GGE vegna sölu á hlutabréfum í HS Orku á árinu 2010 var 1,4 milljarðar króna. Í skýringum með ársreikningnum kemur einnig fram að GGE eigi 7,9% hlut í Magma, sem síðar var sameinað Plutonic Power Corp. og endurnefnt Alterra Power. Sá hlutur var partur af uppgjörinu þegar GGE seldi hlut sinn í HS Orku til Magma. GGE er því enn óbeinn eigandi að HS Orku.thordur@frettabladid.is