Segir skattgreiðendur niðurgreiða útflutt lambakjöt fyrir milljónir

Íslenskir skattgreiðendur niðurgreiða lambakjöt til útlanda fyrir mörg hundruð milljónir á hverju ári. Þetta segir prófessor í Hagfræði. Útflutningur á lambakjöti hefur nærri tvöfaldast frá bankahruni.

Útflutningur á íslensku lambakjöti hefur verið mjög sveiflukenndur og einkum ráðist af gengi krónunnar.

Veruleg dró úr útflutningi um miðbik síðasta áratugar en útflutningurinn jókst hins vegar gríðarlega eftir bankahrun eins og sjá má á þessu súluriti. Í fyrra voru flutt út tæplega tvö þúsund og sjö hundruð tonn af lambakjöti eða um tuttugu og fimm prósent af heildar framleiðslu þess árs.

Kjötið er meðal annars selt í verslunum í Danmörku og Noregi en dæmi eru um að kjötið sé jafnvel ódýrara þar en á Íslandi. Neytendasamtökin hafa fengið fjölmargar ábendingar þessa efnis á síðustu misserum.

Sauðfjárbændur telja að í slíkum tilvikum séu verslanir að selja kjötið undir kostnaðarverði.

„Við vitum það að við erum að fá þúsund krónur í heildsölu fyrir þetta lambakjöt í heilum skrokkum sem við flytjum þarna út og síðan er það í höndum kaupenda og dreifingaraðila hvernig þeir verðleggja það," segir Sigurður Eyþórsson, framkvæmdastjóri Landssamtaka Sauðfjárbænda.

Sauðfjárbændur fá fjóra milljarða króna frá ríkinu á þessu ári. Þórólfur Matthíasson, prófessor í hagfræði, segir að hluti af þessari upphæð fari í að greiða niður verð á lambakjöti til útlendinga.

„Og málið er í rauninni verra vegna þess að við erum að nota þessa fjármuni til að halda uppi starfsemi sem byggir á nýtingu mjög rýrra náttúrugæða. Í rauninni þá erum við að láta sauðkindur naga upp heiðarlönd og flytja það út til erlendra aðila og það má spyrja hvort það sé skynsamleg ráðstöfun á fé og skynsamleg ráðstöfun á þeirri takmörkuðu auðlind sem íslensk heiðarlönd eru," segir Þórólfur.

Upphæðin sem hér um ræði hleypur tugum ef ekki hundruðum milljóna króna. Sauðfjárbændur hafna þessum fullyrðingum.

„Greiðslurnar sem bændur fá eru ekki framleiðslubundnar þær mundu ekki breytast þó að við myndum bara framleiða það magn sem seldist hér innanlands þannig að við teljum að það sé ekki verið að greiða neitt sérstaklega niður til útflutnings," segir Sigurður.