Vilja að innanríkisráðuneytið kanni hvort lög hafi verið brotin

Borgarfulltrúar Sjálfstæðisflokksins efast um að það standist lög að ársreikningur borgarinnar fyrir síðasta ár hafi verið settur upp án skýrs samanburðar við upphaflega fjárhagsáætlun borgarinnar.

Í sveitarstjórnarlögum sé skýrt kveðið á um það að ársreikningur skuli settur fram með þeim hætti að endanleg niðurstaða fjárhagsáætlunar sé borin saman við upphaflega áætlun. Sjálfstæðismenn segja að þar sem borgin hafi ekki getað staðfest að þessi villandi framsetning stæðist umrædd lög hafi borgarfulltrúar flokksins kynnt við afgreiðslu reikningsins að þeir myndu leita álits innanríkisráðuneytisins á málinu.

„Það er nauðsynlegt að fá úr því skorið hvort framsetning ársreikningsins standist lög eða ekki. Við höfum margítrekað gert athugasemdir við það að reikningurinn sé settur upp með þeim hætti að næstum ómögulegt sé að bera hann saman við þær áætlanir sem hann á að byggja á. Ársreikningar borgarinnar hafa ekki verið settir fram með þessum hætti í langan tíma og með ólíkindum að meirihlutinn skuli standa að slíkri afturför í upplýsingagjöf, þrátt fyrir ný og skýrari lög um ársreikninga frá síðasta hausti. Slík framsetning er ekki aðeins villandi og vond þegar kemur að því að skoða stöðu og þróun fjármála sveitafélaga, heldur brýtur hún beinlínis gegn því markmiði laganna að ársreikningar séu aðgengilegir og auðvelt sé að bera saman upphaflegar áætlanir og endanlega niðurstöðu." segir Hanna Birna Kristjánsdóttir, oddviti Sjálfstæðissflokksins í borgarstjórn, í tilkynningu.