Yfir 7 milljarðar fóru í líftryggingar hjá erlendum félögum

Íslendingar borguðu yfir 7 milljarða króna í iðgjöld fyrir líftryggingar hjá erlendum tryggingarfélögum árið 2010. Markaðshlutdeild hinna erlendu félaga í þessum tryggingum nam 67,5% af heildinni þetta ár.

Þessar upplýsingar koma fram á vefsíðu Fjármálaráðuneytisins þar sem birt hefur verið yfirlit um starfsemi erlendra tryggingarfélaga á Íslandi árin 2008 til 2010. Iðgjöldin sem Íslendingar greiddu til hinna erlendu félaga fyrir líftryggingar hátt í tvöfölduðust á þessu tímabili en þau námu rúmum 3,8 milljörðum kr. árið 2008. Hér er rétt að taka fram að gengi krónunnar veiktist verulega milli þessara tveggja ára.

Hlutdeild hinna erlendu félaga í öðrum tryggingum er mjög lítil eða vel undir 10% í flestum tilvika. Hlutdeildin er raunar engin þegar kemur að ökutryggingum en nam 4,2% í slysa- og sjúkratryggingar og 7,3% í eignatryggingar árið 2010 svo dæmi séu tekin.

Hæsta hlutfallið hjá hinum erlendu tryggingarfélögum, fyrir utan líftryggingarnar, var í ábyrgðartryggingum eða rúm 23%.