ASÍ telur ríkið brjóta gegn jafnræðisreglu

ASÍ telur ríkið brjóta gegn jafnræðisreglu með innheimtu fjársýsluskatts frá lífeyrissjóðunum og undirbýr nú málaferli. Vegið er að lífeyrissjóðskerfinu með skattheimtu og ágengni stjórnmálamanna segir fyrrverandi forseti sambandsins.

Hiti var í mönnum á ráðstefnu um framtíð lífeyrismála í gær en þar kom meðal annars fram að Alþýðusamband Íslands væri með málaferli á hendur ríkinu í undirúningi vegna fjársýsluskatts sem lagður er á lífeyrissjóði og banka. Gylfi Arnbjörnsson segir skattlagninguna koma verr niður á þeim sem eiga réttindi í almennum lífeyrissjóðum en þeim sem hafa greitt í opinbera sjóði sem ríki og sveitarfélög ábyrgjast. Fjallað er um málið í Fréttablaðinu í dag en þar segir Gylfi almenna lífeyrissjóði verða að skerða greiðslur til sinna lífeyrisþega vegna skattlagningarinnar, en sama eigi ekki við um lífeyrissjóði opinberra starfsmanna því þó þeir sjóðir þurfi að greiða skattinn mun ríkið á sama tíma leggja þeim til fjármuni til að sjá til þess að skatturinn hafi ekki áhrif á stöðu sjóðsfélaganna.

Ásmundur Stefánsson, fyrrverandi forseti ASÍ, tók einnig til máls á ráðstefnunni og sagði að nú væri mál að standa saman og verja lífeyrissjóðskerfið sem upp hafi verið byggt.

„Og af því er vegið með skattheimtu og ágengni af hálfu stjórnmálamannanna í þessa fjármuni. Það er alveg eins og með litlu gulu hænuna sem fann fræ. Þegar hún er búin að baka kökuna þá geta allir verið með, það geta allir deilt út peningum sem eru komnir í sjóð en það bara má ekki leyfa þeim að gera það. Og mér finnst að lífeyrissjóðirnir eigi að vera skýrari og afdráttarlausari í afstöðu sinni með það að það kemur ósköp einfaldlega ekki til greina, þeir hafa engan rétt til þess að deila út þeim fjármunum sem við ætlum að lifa á til dauðadags," segir Ásmundur Stefánsson fyrrverandi forseti ASÍ.