Viltu fara til New York og fá pening að auki? Spilaðu þá með

Ávöxtunarleikurinn hefur formlega hafið göngu sína en innskráning í hann fer fram hér, á Vísi. Leikurinn byggist á því að þátttakendur reyna að ávaxta spilapeninga sína sem best og geta fjárfest í margvíslegum eignaflokkum, s.s hlutabréfum, skuldabréfum, sjóðum og gjaldeyri. Leikurinn fylgir nákvæmlega raunbreytingum á markaði og byggir ávöxtun þátttakenda á þeim. Leikurinn er fullkomnasti fjárfestahermir sem settur hefur verið upp hér á landi.

Keldan er eigandi og rekstraraðili leiksins en hann er samstarfsverkefni Vísis, VÍB eignastýringarþjónustu Íslandsbanka, Kauphallarinnar og Libra. Leikurinn verður meðal annars nýttur í námskeiðahaldi á vegum VÍB, og verður kynning á leiknum á fundi á vegum VÍB klukkan 17:00 á morgun.

Markmiðið með leiknum er að stuðla að betra fjármálalæsi og skilningi á ávöxtunarmarkaði fyrir fjármuni hér á landi, og hentar því ekki síst vel fyrir framhaldsskólanema, háskólanema og starfsfólk á vinnustöðum. Hægt er að keppa í einstaklings- og liðakeppnum í leiknum. Leikurinn veitir góða innsýn í fjárfestingaumhverfið hér á landi, sem er um margt krefjandi, innan gjaldeyrishafta.

Þátttakendur fá 10 milljónir spilapeninga, Keldukróna, við upphaf leiksins og reyna síðan að ávaxta féð sem best með fjárfestingum, eftir reglum leiksins.

Til mikils er að vinna fyrir þann sem skilar bestu ávöxtun þegar keppnin verður gerð upp næsta vor. Vinningar fyrir sigurvegara keppninnar eru m.a. ferð fyrir tvo til New York og 200.000 krónur í sjóðum hjá VÍB. Jafnframt verða veitt verðlaun til hástökkvara mánaðarins hverju sinni, út keppnistímabilið.

Sjá má Facebook síðu leiksins hér en þar verður hægt að fylgjast náið með gangi mála í leiknum, auk þess sem tilkynnt verður um hástökkvara mánaðarins á síðunni og allt annað er við kemur leiknum.

Innskráning í leikinn fer fram hér, á viðskiptavef Vísis.