HB Grandi fær stóra lóð á Norðurgarði

Stjórn Faxaflóahafna hefur samþykkt að úthluta HB Granda hf. alls um 13.700 fm lóð á Norðurgarði til að byggja á frystigeymslu og móttökuhús fyrir frystan fisk. Geymslan verður um 2.500 fm að stærð og mun taka um 2000 tonn af sjávarafurðum.

Á vefsíðu Faxaflóahafna segir að HB Grandi hf. eigi og reki 5 frystiskip sem landa um 22.500 tonnum frystum fiski á Norðurgarði auk þess sem um 5.800 tonn af fiski eru unnin í fiskiðjuveri fyrirtækisins. Núverandi aðstaða og frystipláss er ekki fullnægjandi og kallar á úrbætur þannig að fyrirtækið mæti bestu gæðakröfum sem gerðar eru til meðhöndlunar á hráefninu.

„Stjórn Faxaflóahafna sf. hefur lýst yfir ánægju sinni með að fyrirtækið hyggist styrkja starfsemi sína og halda áfram uppbyggingu fyrirtækisins en samhliða úthlutun lóðarinnar á Norðurgarði gera aðilar með sér samkomulag um að HB Grandi vinni með Faxaflóahöfnum sf. og Sambandi íslenskra myndlistarmanna að hönnun á ytra byrði frystigeymslunnar þannig að útlit hennar verði öllum til mikils sóma," segir á vefsíðunni.

„Þá mun HB Grandi hf. vinna á næstu árum að endurbótum á útliti eigna á lóðinni Grandagarður 20 þar sem áður var fiskimjölsverksmiðja félagsins. Loks skal nefnt að aðgát verður að hafa við framkvæmdir á svæðinu þar sem hinn "forni" Norðurgarður liggur í gegnum lóðina, en fyrirtækið mun vinna að lausn á því verkefni í samvinnu við Faxaflóahafnir sf. og Húsafriðunarnefnd.

HB Grandi hf. hyggst flytja framleiðslu sína út með skipum sem lesta mun vöru frá fyrirtækinu við Norðurgarð þannig að akstur með gáma úr Gömlu höfnina í Sundahöfn mun minnka frá því sem nú er. Það er umhverfislega jákvætt skref og bætir samhliða meðferð afurða fyrirtækisins - og lækkar kostnað. Stefnt er að því að frystigeymslan og flokkunarhúsið á Norðurgarði verði tekið í notkun upp úr miðju ári 2014."