Íslensk tækni við að þurrka fisk notuð í Tansaníu

Íslensk tækni sem felst í því að þurrka fisk í sólarofni var nýlega tekin í notkun í Tansaníu. Hún er ódýr í framkvæmd og er talin geta tvöfaldað verðmæti vörunnar.

Kigomabúar í Tansaníu hafa hingað til þurrkað fiskinn sinn í sandi eða í grind ofan í jörðu en þannig skemmist hann hæglega í rigningu og dýr komast auðveldlega að, svo ekki sé minnst á sandinn sem neytendur fá ofan í sig.

„Það má nú segja að saurkólígerlaskalinn hann sprakk," sagði Margeir Gissurarson, verkefnastjóri hjá Matís. „Þannig að það er greinilega mikið af slæmum gerlum í vörunni."

Margeir tók sýni úr fiskinum sem þurrkaður var á gamla mátann. Hann og Sigurjón Arason, yfirverkfræðingur hjá Matís, kynntu fyrir heimamönnum einfalda lausn sem lyftir afurðinni frá jörðu og ver á meðan sólin sér um þurrkunina.

„Við erum með dökka járnplötu í stokkum og jarðplatan drekkur í sig hitann," sagði Sigurjón Arason, yfirverkfræðingur hjá Matís. „En við höldum utan um upphitað loft sem myndast og það er látið leika umfiskinn í ákveðnum klefa, þurrklefa."

Verkefnið, sem var boðið út af Tansaníustjórn, mun skapa talsverða vinnu. Stofnkostnaður er lítill og talið er að verðmæti fisksins tvöfaldist með notkun ofnanna.

„Ef við erum að tala um þrjá til fjóra dollara á kílóið þá er þetta að fara upp í sex til átta dollara á kílóið í dag," sagði Sigurjón en hann og Margeir vonast til að geta kynnt tæknina í öllum þeim löndum sem liggja að Viktoríuvatni.

„Það má áætla að bara úr Viktoríuvatni séu að koma svona 250 þúsund tonn þannig að það er töluvert magn af fiski. Það er mikil búbót ef verðmætin tvöfaldast. Heldur betur, það getur verið mikil hjálp fyrir veiðisamfélagið í heild," sagði Margeir.

Tumi Tómasson forstöðumaður Sjávarútvegsskóla Háskóla Sameinuðu þjóðanna hefur stutt vel við verkefnið og mun koma að námskeiðum sem á að halda í Tansaníu. Þá hafa Ráðgarður skiparáðgjöf, VJI verkfræðistofa og GOCA consulting einnig lagt hönd á plóg.