Fujitsu aftur í boði á Íslandi

Japanski tæknirisinn Fujitsu hefur nú gengið til samstarfs við Opin kerfi um dreifingu, sölu og þjónustu á öllum vörutegundum fyrirtækisins.

Í tilkynningu segir að Fujitsu, sem er þriðja stærsta upplýsingatæknifyrirtæki heims og það stærsta í Japan, var áður áberandi á íslenska tölvumarkaðnum en hinar eftirsóttu og heimsþekktu vörur fyrirtækisins hafa verið ófáanlegar hér á landi í mörg ár.

Fujitsu býður heildstætt úrval af öllum upplýsingatæknivörum og -lausnum og rúmlega 170 þúsund starfsmenn þjónusta notendur Fujitsu-vara í yfir 100 löndum. Tekjur fyrirtækisins á síðasta bókhaldsári námu 54 milljörðum Bandaríkjadala.

Gunnar Guðjónsson, forstjóri Opinna kerfa, segir að samstarf við Fujitsu marki tímamót og sé liður í að bjóða kröfuhörðum viðskiptavinum breiðara úrval af vörum og lausnum frá fremstu framleiðendum heims.

Opin kerfi mun sjá um viðgerðarþjónustu fyrir vörur frá Fujitsu en Opin kerfi hefur áratuga reynslu af þjónustu fyrir hvers kyns tölvubúnað.