10-11 gerir samning við Advania

Rekstrarfélag Tíu ellefu ehf. hefur samið við Advania um heildarlausn í hugbúnaði, rekstri og þjónustu við upplýsingatækniumhverfi sitt. Í tilkynningu frá Advania segir að þar á meðal sé verslunarkerfið LS Retail og fjárhagslausnin Microsoft Dynamics NAV. „Við undirbúning samstarfsins var lögð mikil áhersla á áreiðanleika, hagkvæmni og öryggi hlutaðeigandi lausna."

Árni Pétur Jónsson, forstjóri Rekstrarfélags Tíu ellefu ehf segir að Advania og 10-11 hafi lengi verið í nánu samstarfi á sviði upplýsingatækni, meðal annars þegar kemur að hugbúnaðarlausnum frá Microsoft. „Advania er sömuleiðis leiðandi aðili í hýsingu og rekstri kassakerfa og tengdra hugbúnaðarlausna. Það hentar okkur vel að útvista jaðarþáttum í starfseminni með þessum hætti og einbeita okkur að kjarnastarfsemi."

Rekstrarfélag Tíu ellefu ehf. á og rekur 21 verslun undir vörumerkinu 10-11 og eina verslun undir vörumerkinu Inspired by Iceland. Verslanir 10-11 eru staðsettar í Reykjavík, Kópavogi, Hafnarfirði, Reykjanesbæ og á Akureyri. Þær eru allar opnar allan sólahringinn, nema verslunin í Firði.

„Advania hefur um langt árabil fjárfest markvisst í aðstöðu, búnaði og þekkingu á sviði hýsingar og rekstrarþjónustu. Samningurinn við 10-11 er gott dæmi um að viðskiptavinir okkar kunna vel að meta þessa uppbyggingu. Það er einnig sérstakt ánægjuefni þegar þjónustufyrirtæki í fremstu röð koma til okkar í viðskipti," segir Gestur G. Gestsson, forstjóri Advania.