Landsbankinn ræðst í niðurskurð - lokar útibúum

Landsbankinn mun ráðast í mikinn niðurskurð, sem felur meðal annars í sér lokun útibúa, á næstunni. Samkvæmt heimildum Vísis verður útibúum víða um land lokað. Ekki hafa fengist nákvæmari upplýsingar um þetta. Þegar óskað var eftir upplýsingum frá Kristjáni Kristjánssyni, upplýsingafulltrúa Landsbankans, um málið sagði hann að tilkynningar frá bankanum væri að vænta.

Í tilkynningu frá bankanum segir að bankinn áætli að um 400 milljónir króna sparist á ári með þessum breytingum. Þrátt fyrir þessar aðgerðir muni Landsbankinn eftir sem áður reka víðfeðmasta útibúanet landsins með 38 afgreiðslur og útibú. Mikil áhersla sé lögð á að þjónusta við viðskiptavini raskist sem minnst.

Starfsmönnum bankans mun fækka um 50 við þessar aðgerðir, 29 starfsmönnum hefur verið sagt upp en 15 verið boðinn starfslokasamningur vegna aldurs og verða tryggð full réttindi. Aðrir sem nú hætta hafa áður sagt upp störfum.