Telur að hann hafi átt að fá aðgang að gögnunum

Skiptastjóri þrotabús Milestone segir að öll þau gögn sem afhent voru á grundvelli rannsóknarinnar hafi annaðhvort verið í eigu þrotabúsins eða þrotabúinu heimilt að fá aðgang að þeim á grundvelli gjaldþrotalaga. Þetta segir í yfirlýsingu sem Grímur Sigurðsson skiptastjóri þrotabúsins sendi frá sér í dag.

Eins og fram kom í gær hefur ÓIafur Þór Hauksson, sérstakur saksóknari, kært tvo menn til ríkissaksóknara fyrir að hafa lekið upplýsingum um rannsókn Milestone málsins. Í yfirlýsingunni frá skiptastjóra segir að hann hafi talið mikils virði að reyndir rannsóknarlögreglumenn ynnu þessa vinnu með þeim skipulagða hætti sem hún krefðist. Umfangsmikil rannsókn þeirra skilaði þrotabúinu miklu magni af gögnum um rekstur Milestone, auk skýrslu um félagið. Skiptastjóri telur að öll þau gögn, sem afhent voru á grundvelli rannsóknarinnar hafi annaðhvort verið í eigu þrotabúsins eða þrotabúinu heimilt að fá aðgang að þeim á grundvelli gjaldþrotalaga.

Grímur segir að við skipti á þrotabúi Milestone hafi í öllu verið farið eftir skýrum fyrirmælum laga um gjaldþrotaskipti. Kæra sérstaks saksóknara beinist enda ekki með neinum hætti að þrotabúi Milestone eða störfum skiptastjóra.