Gullforði Seðlabankans jókst um tæpa 1,4 milljarða

Verðmæti gullforða Seðlabankans jókst um tæplega 1,4 milljarða króna í janúar. Þetta kemur fram í efnahagsreikningi Seðlabankans.

Heimsmarkaðsverð á gulli hefur hækkað töluvert í janúar sem og flest önnur hrávara. Ein af ástæðum þess er ótti fjárfesta við gjaldþrot Grikklands sem færst hefur töluvert í aukana á síðustu vikum. Þróunin hefur leitt til þess að gullforði Seðlabankans var orðinn rúmlega 13,6 milljarðar króna í lok janúar samkvæmt efnahagsreikningum. Þar að auki reikna sérfræðingar með að gull muni halda áfram að hækka í verði út þetta ár.

Í efnahagsreikningnum má einnig sjá að Seðlabankinn borgaði tæplega 50 milljarða króna til Alþjóðagjaldeyrissjóðsins og minnkaði þannig skuldina við sjóðinn niður í 215 milljarða króna. Þetta var svo aftur að mestu skýringin á því að nettóstaðan á gjaldeyrisforða bankans minnkaði um tæpa 39 milljarða króna í janúar.

Heildargjaldeyrisforðinn jókst hinsvegar um tæpa 34 milljarða króna og er orðinn 1.081 milljarður króna. Ástæðan fyrir þeirri aukningu er að mestu fólgin í að bundnar innistæður á gjaldeyrisreikningum jukust um 49 milljarða króna.