Ráðherra leggur fram frumvarp um smálán að nýju

Steingrímur J. Sigfússon, efnahags- og viðskiptaráðherra, ætlar að leggja fram að nýju, í haust, frumvarp vegna starfsemi smálánafyrirtækja. Frumvarpið var lagt fram fyrir þinghlé í vor en ekki náðist að afgreiða það vegna tímaskorts. Efni frumvarpsins felur ekki í sér bann við smálánum, heldur er verið að setja starfsemi smálánafyrirtækja þrengri skorður.

Fram kemur í tilkynningu frá efnahags- og viðskiptaráðuneytinu að veiting smálána falli ekki undir ákvæði núgildandi laga um neytendalán, en í þeim er ákvæði um að lánssamningar sem gilda skemmri tíma en þrjá mánuði séu undanskildir gildissviði laganna. Í frumvarpi til nýrra laga um neytendalán er lagt til að ákvæði þess gildi um öll neytendalán óháð fjárhæð, þ.m.t. smálán. Frumvarpið tekur tillit til laga og reglna sem gilda á EES svæðinu.

Væntanlegt frumvarp mun einkum taka á smálánum með tvennum hætt, eða á þann hátt sem lýtur að upplýsingaskyldu og hins vegar að lánshæfis- og greiðslumati:

Í öllum auglýsingum, sem varða lánssamninga þar sem gefnar eru upplýsingar um vexti eða tölur varðandi kostnað neytandans af láninu, verður gerð krafa um að fram komi staðlaðar upplýsingar, s.s. um útlánsvexti, árlega hlutfallstölu kostnaðar, lánsfjárhæð og lengd lánssamnings. Fyrir og við samningsgerðina sjálfa eru síðan enn ítarlegri upplýsingakröfur. Neytendur ættu því að vera vel upplýstir um þau kjör sem lánveitendur bjóða.

Frumvarpið kveður á um að mat á lánshæfi neytanda skuli fara fram áður en lánssamningur er gerður: (i) Lánveitandi skal áður en lánssamningur er gerður meta lánshæfi lántaka.