Eldgosin kostuðu ríkissjóð 1,5 milljarð aukalega

Ríkissjóður hefur eytt tæpum einum og hálfum milljarði í fjárveitingar vegna eldgosanna í Fimmvörðuhálsi og í Eyjafjallajökli vorið 2010 og í Grímsvötnum vorið 2011. Þá er ekki meðtalinn kostnaður stofnana sem fjármagnaður hefur verið af reglubundnum árlegum fjárheimildum þeirra. Þrátt fyrir það hefur ekki reynst unnt að bæta tjón allra í öllum tilvikum, ekki frekar en í kjölfar annarra náttúruhamfara á síðustu áratugum.

Sjálfboðaliðar hafa unnið ómetanlega vinnu í kjölfar eldgosanna en sömuleiðis hefur stjórnkerfið og þjóðin öll „sýnt hvað í henni býr og styrkleika kerfis okkar," segir í svari forsætisráðherra við fyrirspurn Sigurðar Inga Jóhannssonar, þingmanns Framsóknarflokks, um stöðu tjónþola eftir hamfarirnar.

Enn í dag er öskufok á svæðunum sem um ræðir hvimleitt og heilsuspillandi í þurrviðri og mikil hætta á flóðum og aurframburði í ám. Útgjöld vegna hamfaranna eru ekki að baki og enn viðbúið að meiri útgjöld falli á ríkisstofnanir.