Kanna aðgerðir til að eyða óvissu um gengislánin

Stjórnvöld kanna nú hvort frekari aðgerða sé þörf til að hraða meðferð mála fyrir dómstólum sem tengjast gengislánum og þeirri óvissu sem ríkir um þau. Alls eru ellefu gengislánamál nú til meðferðar og bíða þau niðurstöðu dómstóla.

Ráðherranefnd um efnahagsmál fundaði um málið í dag. Þar var meðal annars fjallað um mál sem hafa verið til umræðu í fjölmiðlum undanfarið um innheimtu banka og annarra lánastofnana á gengislánum sem dæmd hafa verið ólögmæt.

Þau sem sátu fundinn voru Jóhann Sigurðardóttir, forsætisráðherra, Oddný G. Harðardóttir, fjármálaráðherra og Ögmundur Jónasson, starfandi efnahags- og viðskiptaráðherra ásamt aðstoðar- og embættismönnum.

Lögfræðingarnir Lúðvík Bergvinsson og Sigurvin Ólafsson voru kallaðir á fundinn en þeir birtu í síðustu viku greinargerð þar sem spurt er hvort ólögmæt lán geti verið í vanskilum. Þá voru fulltrúar Fjármálaeftirlitsins einnig á fundinum.

Efnahags- og viðskiptanefnd Alþingis kemur saman til fundar næstkomandi miðvikudag en þar verður fjallað um þau álitamál sem fjallað hefur verið um í fjölmiðlum og afborganir af gengislánum.