Rekstrarkostnaður Seðlabankans jókst um 400 milljónir

Rekstrarkostnaður Seðlabanka Íslands nam í fyrra 2314 milljónum króna og hækkaði um rúmar 400 milljónir frá árinu á undan þegar hann nam 1910 milljónum. Þetta kemur fram í svari Steingríms J. Sigfússonar, efnahags- og viðskiptaráðherra, við fyrirspurn Guðlaugs Þ. Þórðarsonar, þingmanns Sjálfstæðisflokksins.

Í svarinu kemur fram að umtalsverðar starfsmannabreytingar urðu á milli áranna 2010-2011. 19 starfsmenn létu af störfum og 22 starfsmenn voru ráðnir og fjölgaði því um þrjá milli ára. Háskólamenntuðum starfsmönnum fjölgaði um sex milli ára, en háskólamenntaðir starfsmenn eru almennt á hærri launum en starfsmenn með minni menntun.

Þá kemur fram í svarinu að í fyrra voru nýir kjarasamningar samþykktir og höfðu þeir í för með sér 4,25% launahækkun 1. júní, auk eingreiðslna 1. júní, 1. júlí og 1. desember, samtals 75.000 kr. fyrir hvern starfsmann í fullu starfi á árinu 2011.