Gjaldþrotum fyrirtækja hefur fækkað um 31% milli ára

Alls voru 118 fyrirtæki tekin til gjaldþrotaskipta í októbermánuði, flest í byggingarstarfsemi og mannvirkjagerð. Fyrstu 10 mánuði ársins var fjöldi gjaldþrota 910, sem er tæplega 31% fækkun frá sama tíma í fyrra þegar 1.317 fyrirtæki voru tekin til gjaldþrotaskipta.

Þetta kemur fram á vefsíðu Hagstofunnar. Þar segir að flest gjaldþrot, það sem af er árinu eru í flokknum byggingarstarfsemi og mannvirkjagerð, 189 talsins.

Í októbermánuði voru skráð 155 ný einkahlutafélög, flest í fasteignaviðskiptum. Til samanburðar voru 143 ný einkahlutafélög skráð í október í fyrra.

Fyrstu 10 mánuði ársins var fjöldi nýskráninga 1.473, en það er rúmlega 5% aukning frá sama tíma í fyrra þegar 1.398 fyrirtæki voru skráð.