Spáir því að verðbólgan fari í 6,2%

Greining Arion banka spáir því að ársverðbólgan fari í 6,2% í janúar. Þetta er umtalsverð hækkun frá desember þegar verðbólgan mældist 5,3%.

Fjallað er um málið í Markaðspunktum greiningarinnar. Þar segir að greiningin spáir 0,1% lækkun vísitölu neysluverðs (VNV) í janúar. Þrátt fyrir að um sé að ræða útsölumánuð er ýmislegt annað sem má tína til sem vegur upp á móti verðlagslækkunum. Helst ber að nefna gríðarlegar hækkanir á eldsneytisverði og skatta- og gjaldskrárhækkanir hins opinbera.

Einnig er útlit fyrir að matvara hækki nokkuð í mánuðinum. Gangi spáin eftir mun 12 mánaða verðbólga mælast 6,2% í janúar. Mikil óvissa ríkir um verðbólguhorfur, en flest bendir til þess að umtalsverð hækkun sé í pípunum á næstu mánuðum.

„Samkvæmt bráðabirgðaspá gerum við ráð fyrir 1% hækkun í febrúar og einnig í mars en mánaðartakturinn mun svo lækka niður fyrir 6% í apríl," segir í Markaðspunktunum.