Vilja byggja heilsuþorp á Flúðum fyrir Kínverja og hagsmunasamtök

„Þetta er jákvætt og skemmtilegt verkefni og passar vel við ímyndina okkar, segir Jón G. Valgeirsson, sveitastjóri á Flúðum, en dagblaðið Sunnlenska greindi frá því í dag að kínverskir fjárfestar vilja byggja upp heilsuþorp á Flúðum og leggja til þess 6,5 til 7 milljarða króna. Sveitarfélagið mun leggja til landið Gröf sem er um sjö hektara svæði við Litlu-Laxá.

Að sögn Jóns mun sveitarfélagið ekki leggja til fé í uppbygginguna, eingöngu landið. Málið hefur verið samþykkt hjá bæjarstjórn auk þess sem viljayfirlýsing hefur verið gefin út.

Undirbúningur verkefnisins hefur staðið yfir í árabil. Sá sem fer fyrir verkefninu er fyrrverandi þingmaðurinn Árni Gunnarsson, en hann er formaður stjórnar Heilsuþorpsins á Flúðum ehf.

Í Sunnlenska í dag er rætt við Árna. Þar segir að fyrirtæki Árna hafi átt í viðræðum við kínverska fyrirtækið CSST International um að gerast hluthafi í Heilsuþorpinu og taka þátt í byggingu þjónustukjarna þar sem yrði meðal annars fjöldi íbúðabygginga ásamt þjónustubyggingu sem myndi hýsa læknaþjónustu, veitingahús, líkamsrækt, nudd, hótel og fleira. Áform um bygginguna hafa verið kynnt umhverfisráðuneytinu og í gangi er rannsókn á náttúrufari og fornleifaskráning innan lands Grafar, þar sem byggð hefur verið í aldaraðir.

Viðskiptahugmyndin byggir meðal annars á því að byggðir verða kofar sem hagsmunasamtök munu eiga. Kínverjarnir hafa einnig áhuga á að senda fólk hingað til lands í þeim tilgangi að landar þeirra geti notið heilsuþorpsins.

Rætt hafi verið við ferðaskrifstofur erlendis sem selja fólki heilsutengda þjónustu og þær sýnt verkefninu mikinn áhuga.

„Þetta er afar stórt fyrirtæki," segir Árni um CSST International í viðtali við Sunnlenska.

Eftir því sem næst verður komist hefur fyrirtækið í auknum mæli fjármagnað ýmis verkefni í Kína, Ástralíu og víðar en hefur einnig sérhæft sig í rafrænni og stafrænni tækni.