Mjög ánægjuleg tíðindi fyrir samkeppnishæfni Íslands

Stóriðjuframkvæmdir fyrir yfir eitthundrað milljarða króna eru í farvatninu í Þingeyjarsýslum, við tvö kísilver og tvær virkjanir. Landsvirkjunarmenn segja þetta ánægjuleg tíðindi sem staðfesti samkeppnishæfni Íslands.

Tvö fyrirtæki, Thorsil og PCC, stefna nú bæði að því að hefja smíði kísilverksmiðju við Húsavík á næsta ári. Landsvirkjun staðfestir að þetta séu líklegustu verkefnin. Magnús Bjarnason, framkvæmdastjóri markaðs- og viðskiptaþróunarsviðs Landsvirkjunar, segir bæði þessi verkefni langt komin.

„Og menn hafa verið að stíga mjög ákveðin skref í að þróa þau áfram þannig að það er margt sem bendir til þess að við munum sjá kísilmálmverksmiðju rísa á Norðausturlandi á næstu árum," segir Magnús.

Til að mæta orkuþörfinni áformar Landsvirkjun nýjar jarðgufuvirkjanir í Bjarnarflagi og á Þeistareykjum og Landsnet þarf að leggja háspennulínur þaðan til Húsavíkur. En ræður Landsvirkjun við að fá tvær verksmiðjur á Bakka sem orkukaupendur á sama tíma?

Magnús segir að ekki væri óeðlilegt þótt einhver misseri myndu líða á milli en kveðst ekki geta sagt um hve margir mánuðir það væru.

„En það þyrfti ekki að vera mjög langur tími vegna þess að þessir aðilar eru ekki að taka það mikla orku."

Spurður um hvenær Landsvirkjun gæti byrjað að afhenda þeim orku svarar Magnús að fyrirtækið stefni að því að vera tilbúið með orkuna í árslok 2015.

Fjárfesting á næstu árum í þessum tveimur verksmiðjum færi yfir fimmtíu milljarða króna og annað eins kostaði að byggja upp orkumannvirki. Magnús tekur skýrt fram að engir orkusamningar séu í höfn en engu að síður sjái menn markverð skilaboð.

„Hlutirnir eru að hreyfast í rétta átt og þetta eru mjög ánægjuleg tíðindi fyrir okkur hjá Landsvirkjun, - mjög ánægjuleg tíðindi fyrir okkur hér á Íslandi, - vegna þess að á sama tíma eru efnahagsmál heimsins í miklu uppnámi. Þetta er staðfesting á samkeppnishæfni okkar og samkeppnishæfni Íslands. Mjög ánægjulegt," segir Magnús.