Átján ríki nota gjaldmiðil annars ríkis

Alls nota átján fullvalda ríki gjaldmiðil annars ríkis, að því er fram kemur í sérriti Seðlabanka Íslands um gengis- og gjalmiðlamál. Fjallað er um ríkin í sérstökum kafla um einhliða upptöku nýrra gjaldmiðla. Flest ríkin eru fyrrum nýlendur, sem mörg hver hafa haldið áfram að nota gjaldmiðil fyrrum nýlenduherra eða síðar tekið upp gjaldmiðil þess ríkis sem vegur þyngst í utanríkisviðskiptum þeirra, í flestum tilvikum Bandaríkjadollar. Sjá má lista yfir ríkin átján hér að neðan.

Ríki	Mannfjöldi (þús.)	Ríki	Mannfjöldi (þús.)
Andorra	85	Mónakó	31
Austur-Tímor	1.178	Nárú	9
Ekvador	15.007	Palá	21
El Salvador	6.072	Palestínuríki	2.569
Kíribatí	101	Panama	3.460
Kósóvó	1.826	San Marínó	32
Liechtenstein	35	Svartfjallaland	662
Marshalleyjar	67	Túvalú	11
Míkrónesía	107	Vatíkanið	1

Flest ofangreindra ríkja nota Bandaríkjadal eða sjö þeirra. Sex ríki nota evruna, þrjú Ástralíudal, eitt svissneskan franka og eitt notar ísraelskan sikil. Af sjö Evrópuríkjum sem nota annan gjaldmiðil eru fimm smáríki sem tóku upp annan gjaldmiðil á tuttugustu öld og í byrjun þeirrar tuttugustu og fyrstu, þ.e. Andorra, Liechtenstein, Mónakó, San Marínó og Vatíkanið, að því er segir í riti Seðlabanka Íslands. „Hinn 1. janúar 1999 tóku San Marínó, Vatíkanið og Mónakó formlega upp evruna. Þau hafa þá sérstöðu að hafa lagalegan rétt á að nota evruna þar sem þau voru með samninga við Frakkland og Ítalíu áður en myntbandalagið var stofnað. Andorra bættist í þeirra hóp árið 2011 með samningi við Evrópusambandið," segir í riti Seðlabankans.

Eins og greint hefur verið frá á Vísi.is og í fréttum Stöðvar 2, segir Seðlabanki Íslands að augljósasti kosturinn fyrir Ísland, ef það á að hætta með krónuna á annað borð, sé að taka upp evru á grundvelli samkomulags við Seðlabanka Evrópu og inngöngu í Evrópusambandið.

Sjá má kaflann um einhliða upptöku, í sérriti Seðlabankans, hér.