Argentínumenn kynna sér nýtingu jarðvarma á Íslandi

Fjórtán argentínskir ráðherrar eru staddir eru á Íslandi til þess að skoða hvernig Íslendingar nýta sér jarðvarma. Sigurður Óskar Arnarsson var hópnum innan handar í dag og sýndi þeim helstu svæði á Suðurlandi þar sem Íslendingar hafa hagnýtt orku úr jörð.

„Argentínumenn eiga töluvert af jarðvarma sem þeir eru ekkert að nýta í dag. Hafa tekið þá ákvörðun að opna fyrir þann möguleika að nýta þann möguleika að einhverju leyti eða öllu," útskýrir Sigurður Óskar, sem hefur unnið í Argentínu í sex ár. Hann segir að hver ráðherrra sé mættur fyrir sitt hérað. „Það hefur ekkert verið að gerast þarna í fjölda ára og nú er allt að opnast," bætir hann við.

Argentínumennirnir komu seinni partinn i gær og dagskráin hefur verið þétt í dag. „Við byrjuðum í morgun með því að fara í Hellisheiðavirkjun," segir hann, en því næst var haldið á veitingastaðinn Kjöt og kúnst, þar sem allt er eldað með gufu. Hópurinn fór svo á Suðurnesin, þar sem fiskvinnsla í Grindavík var skoðuð og HS Orka var heimsótt. Að sjálfsögðu var líka farið í Bláa lónið.

Á morgun verður síðan meðal annars fundað með umhverfis- og orkumálaráðherra og forseta Íslands.