Landsvirkjun hlýtur viðurkenningu fyrir samning

Fagtímaritið Trade Finance Magazine hefur valið verktakafjármögnun Landsvirkjunar vegna Búðarhálsvirkjunar sem einn af samningum ársins 2011.

Fjallað er um málið á vefsíðu fyrirtækisins en þar segir að Landsvirkjun hlýtur viðurkenninguna fyrir verktakafjármögnun sem félagið gerði vegna verksamnings um framleiðslu og uppsetningu á véla- og rafbúnaði Búðarhálsvirkjunar. Lánasamningurinn hljóðaði upp á um 45 milljónir dollara.

Trade Finance Magazine, sem er hluti af Euromoney, veitir viðurkenninguna og bar dómnefnd saman fjármögnunarsamninga sem gerðir voru í Evrópu, Mið-Austurlöndum og Afríku á árinu 2011.

Í umsögn dómnefndar segir meðal annars að það hafi vakið athygli að á sama tíma og lausafjárvandræði væru á fjármálamörkuðum í Evrópu hafi Landsvirkjun tekist að tryggja fjármögnun til mjög langs tíma eða til allt að 21 árs.