Háskólabíó í fjárhagsvandræðum

Háskólabíó á í verulegum fjárhagsvandræðum samkvæmt Fréttatímanum í dag. Þar er greint frá því að alls hvíli 230 milljónir króna í lánum á húsnæði Háskólabíós sem er í raun og veru að sliga starfsemina. Mánaðarlegar afborganir af húsnæðinu eru 3,5 til 4 milljónir króna á mánuði samkvæmt Guðmundi R. Jónssyni, framkvæmdastjóra fjármála og reksturs Háskóla Íslands.

Að auki hefur Háskólabíó tekið lán í formi fyrirframgreiddrar leigu á húsnæðinu til Háskóla Íslands og Landsbankans sem nema nokkur hundruð milljónum. Leigan á húsnæði Landsbankans hefur verið greidd fram til ársins 2014 en Háskólinn hefur greitt Háskólabíói leigu á kennsluaðstöðu til ársins 2020. Því koma engar tekjur inn af leigu þess húsnæðis fyrr en að þeim tíma liðnum að því er Fréttatíminn greinir frá.

Rekstrarkostnaður húsnæðisins er ríflega 100 milljónir á ári og standa núverandi leigusamningar vegna kvikmyndasala, sem Sena er með á leigu, og útleiga á stóra salnum til viðburða, nokkurn veginn undir rekstrarkostnaði. Eftir standa afborganir af lánum, sem Háskólabíó ræður ekki lengur við. Ástæðan er meðal annars sú að Sinfóníuhljómsveit Íslands flutti í Hörpuna fyrir skömmu. Þannig hverfa 50 milljón króna leigutekjur sem áður nægðu til þess að láta enda ná saman.

Nú er svo komið að Háskólabíó hefur biðlað til Háskóla Íslands um að kaupa húsnæði Háskólabíós og taka jafnvel yfir rekstur hússins. Í Fréttatímanum kemur fram að ef það verður niðurstaðan mun Háskóli Íslands ekki falast eftir auknum fjárveitingum frá ríkinu til þess að fjármagna kaupin heldur yrði upphæðin tekin af framkvæmdafé skólans. Fasteignaverð Háskólabíós er 1,2 milljarðar en það er Sena sem leigir húsnæðið.

Hægt er að lesa nánar um málið á vefsíðu Fréttatímans.