Segja stjórnendur bankanna hafa veikt krónuna með óforsvaranlegum hætti

Tugir milljarða króna gætu verið í húfi fyrir Lífeyrissjóð verzlunarmanna, einn stærsta lífeyrissjóð landsins, vegna deilu um gjaldeyrissamninga við slitastjórn Glitnis og Kaupþings. Stjórn lífeyrissjóðsins telur að stjórnendur bankanna hafi skaðað hagsmuni lífeyrissjóðsins ólöglega og veikt krónuna með óforsvaranlegum hætti.

Fyrir fall viðskiptabankanna gerði Lífeyrissjóður verzlunarmanna gjaldmiðlavarnarsamninga við Kaupþing og Glitni. Um var að ræða tvíhliða samninga sem gerðir voru til að takmarka gjaldmiðlaáhættu sjóðsins.

Lífeyrissjóðurinn hafði nýtt slíka samninga til að jafna sveiflur í ávöxtun erlendra eigna sem voru þriðjungur af eignum sjóðsins á sama tíma og allar skuldbindingar sjóðsins eru verðtryggðar í krónum.

Í rúm þrjú ár hefur verið reynt að semja um uppgjör þessara samninga án árangurs. Slitastjórnir hinna föllnu banka hafa hvor um sig krafið lífeyrissjóðinn um greiðslur sem þær ætla að sjóðurinn skuldi hinum föllnu bönkum vegna uppgjörs samninganna. Lífeyrissjóðurinn telur að þær kröfur standist ekki lög.

Það byggir m.a. á því að allar forsendur fyrir gerð samninganna hafi brostið við þrot bankanna. „Það liggur yfirr grunur um að það hafi verið markaðsbrestur og það er grunur um það líka að það hafi verið markaðsmisnotkun í hlutabréfa- og gjaldeyrisviðskiptum," segir Helgi Magnússon, formaður stjórnar LV.

„Skaðað hagsmuni lífeyrissjóðsins með ólögmætum hætti"

Stjórn lífeyrissjóðsins segir í yfirlýsingu að stjórnendur hinna föllnu banka hafi „hagað sér með þeim hætti að allar líkur séu til þess að þeir hafi skaðað hagsmuni lífeyrissjóðsins með ólögmætum hætti. Þannig hafi framganga þessara aðila á markaði orðið til þess að veikja krónuna með óforsvaranlegum hætti."

Á mannamáli þýðir þetta að líkur standi til þess að stjórnendur þessara banka hafi fellt krónuna en það þarf auðvitað ekki að fjölyrða um að með hruni hennar rýrnuðu lífskjör alls almennings.

Helgi segir að Lífeyrissjóðurinn hafi enga vitneskju fengið um hverjir væru á hinum enda gjaldmiðlaviðskiptanna en eins og komið hefur fram voru það stórir hluthafar bankans þegar Kaupþing var annars vegar.

„Við vorum bara að eiga viðskipti við bankanna og höfðum enga ástæðu til að ætla annað en að það væri allt með eðlilegum hætti," segir Helgi.

Hann segir að fyrst ekki hafi tekist að semja um uppgjör hafi ekkert annað verið í stöðunni en dómsmál. „Þetta eru milljarðatuga hagsmunir. Það er alveg ljóst. Samkvæmt ítrustu kröfum þessara tveggja banka, bara gagnvart Lífeyrissjóði verzlunarmanna, hleypur þetta á milljarðatugum og aftur ítrustu kröfur okkar, ef það fer í hina áttina, hleypur líka á slíkum tölum." thorbjorn@stod2.is