Stóðu gegn því að hækka gjaldskrá Orkuveitunnar

Borgarfulltrúar sem sæti áttu í stjórn Orkuveitu Reykjavíkur stóðu gegn því að hækka gjaldskrá fyrirtækisins. Fyrir vikið fylgdi gjaldskráin ekki verðbólgu sem gróf undan grunnrekstri fyrirtækisins.

Úttektarnefnd um rekstur Orkuveitu Reykjavíkur, sem kynnti skýrslu sína um fyrirtækið síðastliðinn miðvikudag, fjallar ítarlega um gjaldskrá fyrirtækisins í skýrslu sinni, og þá ákvörðun stjórnar fyrirtækisins, þar sem borgarfulltrúar sátu, að hækka ekki gjaldskrána samhliða verðbólgu, árum saman.

Eins og sést á þessari mynd (sjá sjónvarpsfrétt, hér) fylgdi gjaldskráin ekki verðbólgu, einkum frá árinu 2006 og fram yfir hrun fjármálakerfisins og krónunnar.

Þetta gróf undan grunnrekstri fyrirtækisins á sama tíma og fyrirtækið var skuldum hlaðið.

Í skýrslunni er haft eftir Guðmundi Þóroddssyni, fyrrverandi forstjóra Orkuveitunnar, að arðgreiðslur og þjónustugjöld hafi verið ákveðin af stjórn, og stundum hafi arðgreiðslur verið lækkaðar eða hækkaðar, „til að komast hjá gjaldskrárhækkunum"

Í skýrslunni eru deildar meiningar milli stjórnenda Orkuveitunnar og síðan borgarfulltrúa, um hvernig gjaldskráin hafi átt að vera, augljósar. Þannig er haft eftir Hönnu Birnu Kristjánsdóttur, oddvita Sjálfstæðisflokksins í Reykjavík, að stjórnendur Orkuveiturnar hafi ekki verið sáttir

við þá ákvörðun allrar borgarstjórnar að „frysta gjaldskrár í kjölfar bankahrunsins“, og fannst við ganga of nærri rekstrinum, eins og orðrétt segir í skýrslunni.

Skýrsluhöfundur komast að því að það hafi verið rangt að hækka ekki gjaldskrár, í takt við hækkun skuldbindinga og þróun verðbólgu, svo að grunnrekstur fyrirtækisins héldist í það minnsta heilbrigðari. Skulir Orkuveitu Reykjavíkur hækkuðu úr 17,7 milljörðum árið 2002 í 224,3 milljarða króna árið 2010, að því er fram kemur í skýrslunni.